,,უმაღლესი განათლების შესახებ“ საქართველოს კანონის მე-2 მუხლის ,,ჰ4 “ ქვეპუნქტის, 22-ე მუხლის პირველი პუნქტის, საქართველოს ზოგადი ადმინისტრაციული კოდექსის 51- ე მუხლის პირველი ნაწილის, 52-ე მუხლის პირველი და მე-2 ნაწილების, 53-ე მუხლის პირველი - მე-3 ნაწილების, 54-ე მუხლის პირველი ნაწილის, 55-ე მუხლის, 56-ე მუხლის პირველი და მე-2 ნაწილების, 57-ე მუხლის, ,,საჯარო სამართლის იურიდიული პირის − ივანე ჯავახიშვილის სახელობის თბილისის სახელმწიფო უნივერსიტეტის წესდების დამტკიცების თაობაზე“ საქართველოს განათლებისა და მეცნიერების მინისტრის 2013 წლის 11 სექტემბრის N135/ნ ბრძანებით დამტკიცებული ივანე ჯავახიშვილის სახელობის თბილისის სახელმწიფო უნივერსიტეტის წესდების მე-14 მუხლის პირველი პუნქტის, ამავე მუხლის მე-8 პუნქტის ,,ა“, ,,ო“ და ,,პ“ ქვეპუნქტების, ამავე მუხლის მე-9 ქვეპუნქტის საფუძველზე,

ვ ბ რ ძ ა ნ ე ბ:

1. სსიპ - ივანე ჯავახიშვილის სახელობის თბილისის სახელმწიფო უნივერსიტეტში გამოცხადდეს ყოველწლიური კონკურსი საუნივერსიტეტო ახალი სახელმძღვანელოს ან არსებითად გადამუშავებული/განახლებული სახელმძღვანელოს შექმნის, ასევე, უცხოური სასწავლო ლიტერატურის ქართულ ენაზე თარგმნისა და გამოცემის, დაფინანსებისათვის.

2. გარდა ,,სსიპ - ივანე ჯავახიშვილის სახელობის თბილისის სახელმწიფო უნივერსიტეტის საგანმანათლებლო და სამეცნიერო საგამომცემლო საქმიანობის სრულყოფის მიზნით გასატარებელ ღონისძიებათა შესახებ“ უნივერსიტეტის რექტორის N43/01-01 (2014.03.05) ბრძანებით გათვალისწინებული წესისა, უნივერსიტეტში სახელმძღვანელოების შექმნა, არსებითად გადამუშავება/განახლება, ასევე უცხოური სასწავლო ლიტერატურის ქართულ ენაზე თარგმნა და გამოცემა შესაძლებელია განხორციელდეს და დაფინანსდეს უნივერსიტეტის მიერ წინამდებარე ბრძანების შესაბამისად, უნივერსიტეტის საგამომცემლო საბჭოს სათანადო გადაწვეტილების საფუძველზე.

3. ახალი სახელმძღვანელოს ან არსებითად გადამუშავებული/განახლებული სახელმძღვანელოს შექმნის, ასევე, უცხოური სასწავლო ლიტერატურის ქართულ ენაზე თარგმნისა და გამოცემისთვის დაფინანსების მოსაპოვებლად უნივერსიტეტში ყოველწლიურად ტარდება შერჩევის პროცედურა კონკურსის გზით შესაბამისი ფაკულტეტის მიერ, წინამდებარე ბრძანების პირობების დაცვით.

4. ფაკულტეტზე წარდგენილ საკონკურსო განაცხადებს განიხილავს შესაბამისი ფაკულტეტის საბჭო და შერჩეული განაცხადების თაობაზე ინფორმაციას აწვდის უნივერსიტეტის აკადემიურ საბჭოს (რაც კონკურსის პირველი წლისათვის უნდა განხორციელდეს არაუგვიანეს წინამდებარე ბრძანების ძალაში შესვლიდან 40 სამუშაო დღის ვადაში).

5. საკონკურსო განაცხადის წარდგენა ხდება უნივერსიტეტის აკადემიური პერსონალის მიერ, ფაკულტეტის შესაბამისი სტრუქტურული ერთეულის (მიმართულების/დეპარტამენტის/ინსტიტუტის) თანხმობით, რომლითაც დადასტურდება, რომ მოცემული სახელმძღვანელო კონკრეტული დარგისთვის მნიშვნელოვანია. ფაკულტეტზე განაცხადის შერჩევის კრიტერიუმებსა და წარდგენის ფორმას (სახელმძღვანელოს მოკლე აღწერილობა, აბსტრაქტი) ადგენს შესაბამისი ფაკულტეტის საბჭო.

6. ფაკულტეტის მიერ შერჩეული განაცხადების წარმდგენ პირს/პირებს სახელმძღვანელოების შექმნის, ასევე, უცხოური სასწავლო ლიტერატურის ქართულ ენაზე თარგმნის მიზნებისათვის ეძლევათ ვადა განაცხადის შერჩევიდან არაუმეტეს 2 წლისა. აღნიშნული ვადის გაგრძელების თაობაზე, შესაბამისი საპატიო მიზეზის არსებობის შემთხვევაში, გადაწყვეტილებას იღებს უნივერსიტეტის რექტორი.

7. განაცხადების წარმდგენი პირის/პირების მიერ სახელმძღვანელოს ან უცხოური სასწავლო ლიტერატურის ქართულ ენაზე თარგმანის წარმოდგენის შემდგომ, წარმოდგენილი მასალები გადაეცემა შესაბამისი ფაკულტეტის დარგობრივი სარედაქციო კოლეგიას. დარგობრივი სარედაქციო კოლეგიის მიერ შედგენილი წინასწარი დადებითი დასკვნა არაუმეტეს 20 დღის ვადაში გადაეცემა ფაკულტეტის საგამომცემლო საბჭოს.

8. ფაკულტეტის საგამომცემლო საბჭოს დადებითი დასკვნა გადაეცემა შესაბამისი ფაკულტეტის საბჭოს, რომელიც იღებს გადაწყვეტილებას სახელმძღვანელოს/თარგმანის უნივერსიტეტის საგამომცემლო საბჭოსთვის გადაცემის შესახებ.

9. წინამდებარე ბრძანების მიზნებისათვის უნივერსიტეტის მიერ ბიუჯეტში ყოველწლიურად გათვალისწინებული უნდა იქნას არანაკლებ 350 000 (სამას ორმოცდაათი ათასი) ლარი (თითოეული ფაკულტეტისათვის არანაკლებ 50 000 (ორმოცდაათი ათასი) ლარი).

10. ბრძანების მე-9 პუნქტით განსაზღვრული თანხის ზემოთ არსებული თანხების განაწილება, ფაკულტეტებს შორის ხდება, ივანე ჯავახიშვილის სახელობის თბილისის სახელმწიფო უნივერსიტეტში საუნივერსიტეტო პოლიტიკის სრულფასოვანი რეალიზებისა და უნივერსიტეტის სტრატეგიული განვითარების პროცესზე ზედამხედველობის მიზნით შექმნილი რექტორის საბჭოს გადაწყვეტილებით.

11. სახელმძღვანელოების შექმნასა და, ასევე, უცხოური სასწავლო ლიტერატურის ქართულ ენაზე თარგმნის თაობაზე უნივერსიტეტის საგამომცემლო საბჭოს დადებითი გადაწყვეტილების მიღების შემთხვევაში, დაფინანსება/ჰონორარი განისაზღვრება შემდეგ კრიტერიუმებზე დაყრდნობით:

ა) ასო-ნიშნების რაოდენობა ერთ გვერდზე 2000 ერთეული ინტერვალების ჩათვლით (თარგმანის შემთხვევაში ითვლება ორიგინალური ტექსტის ინტერვალებით);

ბ) 1 გვერდი - 20 ლარი როგორც სახელმძღვანელობის შექმნისას, ასევე თარგმანისთვის, რედაქტირების ჩათვლით (საქართველოს კანონმდებლობით გათვალისწინებული გადასახადების გათვალისწინებით).

გ) სახელმძღვანელო არ უნდა იყოს 200 გვერდზე ნაკლები.

12. გარდა ჰონორარისა, გამოცემული სახელმძღვანელოს/თარგმანის უნივერსიტეტის მიერ რეალიზაცის შედეგად ავტორი/ავტორთა ჯგუფი იღებს უნივერსიტეტის მიერ სახელმძღვანელოს/თარგმანის რეალიზაციიდან მიღებული მოგების 15%-ს.

13. არსებითად გადამუშავებული/განახლებული სახელმძღვანელოს წარდგენის თაობაზე უნივერსიტეტის საგამომცემლო საბჭოს დადებითი გადაწყვეტილების მიღების შემთხვევაში, დაფინანსება/ჰონორარი განისაზღვრება 1000 ლარის ოდენობით.

14. წინამდებარე ბრძანებით განსაზღვრული კონკურსის ვადები ყოველწლიურად განისაზღვრება რექტორის ინდივიდუალურ-ადმინისტრაციული სამართლებრივი აქტით.

15. შერჩეულ მომზადებულ სახელმძღვანელოებზე ან/და ნათარგმნ ლიტერატურაზე, უნივერსიტეტის სივრცეში თავისუფალი წვდომის უზრუნველყოფა დაევალოს უნივერსიტეტის ბიბლიოთეკას.

16. სსიპ - ივანე ჯავახიშვილის სახელობის თბილისის სახელმწიფო უნივერსიტეტში სახელმძღვანელოების შექმნის, ასევე, უცხოური სასწავლო ლიტერატურის ქართულ ენაზე თარგმნისა და გამოცემის დაფინანსების ამ ბრძანებაში განსაზღვრული პირობების გარდა, დამატებითი პირობების (დაფინანსების მიღების პროცედურები, სახელმძღვანელოების შექმნისა და სათარგმნი უცხოური სასწავლო ლიტერატურის მიმართ წაყენებული მოთხოვნების) შემუშავება და რექტორის ინდივიდუალურ-ადმინისტრაციული სამართლებრივი აქტის პროექტის მომზადება, ფაკულტეტებთან კონსულტაციით დაევალოს უნივერსიტეტის იურიდიულ დეპარტამენტს.

17. ბრძანების შესრულებაზე კონტროლი დაევალოს რექტორის მოადგილეს ერეკლე ასტახიშვილს.

18. დაევალოს კანცელარიას ბრძანების ყველასათვის ხელმისაწვდომ ადგილზე განთავსება.

19. დაევალოს საინფორმაციო ტექნოლოგიების დეპარტამენტს ბრძანების უნივერსიტეტის ოფიციალურ ვებგვერდზე განთავსება.

20. ბრძანება ძალაში შედის გამოცემისთანავე.

ჯაბა სამუშია რექტორი