ზუსტ და საბუნებისმეტყველო მეცნიერებათა ფაკულტეტი
ჰუმანიტარულ მეცნიერებათა ფაკულტეტი
სოციალურ და პოლიტიკურ მეცნიერებათა ფაკულტეტი
ფსიქოლოგიისა და განათლების მეცნიერებათა ფაკულტეტი
ეკონომიკისა და ბიზნესის ფაკულტეტი
მედიცინის ფაკულტეტი
იურიდიული ფაკულტეტი
თბილისის სახელმწიფო უნივერსიტეტის რექტორმა აკადემიკოსმა ჯაბა სამუშიამ უნგრეთის საგანგებო და სრულუფლებიან ელჩთან ანა მარია შიკოსთან ერთან ხელი მოაწერა წიგნების კოლექციის გადმოცემის ოფიციალურ დოკუმენტს, რომელიც უნგრეთის საგარეო სამინისტრომ და ეტვეშ ლორანდის სახელობის უნივერსიტეტმა თსუ-ს ბიბლიოთეკას საჩუქრად გადმოსცა.
თბილისის სახელმწიფო უნივერსიტეტის რექტორმა ჯაბა სამუშიამ მადლობა გადაუხადა ელჩს საჩუქრისთვის და იმ ღვაწლისთვის, რომელიც მან ქართულ-უნგრული ურთიერთობების მაქსიმალურად დაახლოებისთვის გასწია. „უნგრეთი ყოველთვის იყო სტრატეგიული პარტნიორი როგორც კულტურული, ისე პოლიტიკური თვალსაზრისით. უნგრეთში არსებული ქართველოლოგიური სკოლა იყო ერთ-ერთი გამორჩეული ცენტრი“, -აღნიშნა ჯაბა სამუშიამ. მისი თქმით, უნგრული ენის მიმართ მაღალი ინტერესი არის იმ პოლიტიკის დამსახურება, რომელსაც მიყვება საელჩო თბილისის სახელმწიფო უნივერსიტეტის უნგრული ენისა და კულტურის ცენტრთან ერთად.
თბილისის სახელმწიფო უნივერსიტეტის ბიბლიოთეკის ხელმძღვანელის ზურაბ გაიპარაშვილის ინფორმაციით, უნგრეთის საგარეო სამინისტროს უნგრული ენის განათლების, დიასპორისა და ბალაშის სახელობის პროგრამების დეპარტამენტმა და ოტვოშ ლორანდის სახელობის უნივერსიტეტმა თსუ-ს ბიბლიოთეკას საჩუქრად 400-მდე წიგნი გადმოსცა. „თბილისის სახელმწიფო უნივერსიტეტის ბიბლიოთეკას უნგრული წიგნების ყველაზე დიდი კოლექცია ექნება. ეს წიგნები განთავსდება სამკითხველოში, ელექტრონულ კატალოგშიც შევა და ხელმისაწვდომი იქნება ყველა დაინტერესებული მკითხველისთვის“, - განაცხადა ზურაბ გაიპარაშვილმა.
შეხვედრაზე უნგრეთის საგანგებო და სრულუფლებიანმა ელჩმა ანა მარია შიკომ ქართულ-უნგრულ მეგობრულ ტრადიციებსა და საერთო ღირებულებებზე ისაუბრა. მან მადლობა გადაუხადა უნივერსიტეტს უნგრული ენისა და კულტურის პოპულარიზაციისთვის, ასევე სტუდენტებს, რომლებიც უნგრული ენისა და კულტურის შემსწავლელ კურსზე სწავლობენ. „ჩვენი ქვეყნების ისტორიული გამოცდილება და ბრძოლისუნარიანობა მსგავსია. ჩვენ მნიშვნელოვანი კულტურული ურთიერთობები გვაქვს და ჩვენი საელჩოს მიზანია, ამ ურთიერთობების გაღრმავებას შევუწყოთ ხელი,“- განაცხადა ელჩმა.
ღონისძიებას თბილისის სახელმწიფო უნივერსიტეტის უნგრული ენისა და კულტურის შემსწავლელი კურსის ხელმძღვანელი არპად ელეში და სტუდენტები ესწრებოდნენ.
