2 ივნისს გაიმართა გენდერული თანასწორობის გეგმის (GEP) პროექტის ოფიციალური გახსნის შეხვედრა, რომელშიც მონაწილეობდნენ ივანე ჯავახიშვილის სახელობის თბილისის სახელმწიფო უნივერსიტეტის, დრეზდენის ტექნიკური უნივერსიტეტისა და ვენის უმაღლესი კვლევების ინსტიტუტის (IHS) წარმომადგენლები.

შეხვედრაზე წარმოდგენილი იყო ევროკავშირის Horizon Europe-ის ფარგლებში მოქმედი სტანდარტები და მოთხოვნები, რომელთა მიხედვითაც გენდერული თანასწორობის გეგმა თანამედროვე ევროპული უნივერსიტეტების განვითარების მნიშვნელოვანი ინსტრუმენტია. განხილული იქნა GEP-ის ოთხი სავალდებულო კომპონენტი: ინსტიტუციური მხარდაჭერა, შესაბამისი რესურსები, მონაცემთა სისტემური შეგროვება და მონიტორინგი, ასევე ტრენინგები და ცნობიერების ამაღლების ღონისძიებები.

მონაწილეებმა მიმოიხილეს პროექტის ფარგლებში 2025 წლის ნოემბრიდან განხორციელებული საქმიანობები და შეთანხმდნენ, რომ TSU-ის გენდერული თანასწორობის გეგმა შემუშავდება მტკიცებულებებსა და მონაცემებზე დაფუძნებული მიდგომით. განსაკუთრებული ყურადღება დაეთმო ქალთა აკადემიური კარიერის განვითარების საკითხებს, ე.წ. „გაჟონილი მილსადენის“ (Leaky Pipeline) პრობლემას, სამუშაოსა და პირადი ცხოვრების ბალანსს, ლიდერულ პოზიციებზე წარმომადგენლობასა და ორგანიზაციულ კულტურას.

განსაკუთრებით საინტერესო იყო დრეზდენის ტექნიკური უნივერსიტეტის გამოცდილების გაზიარება. წარმოდგენილი იქნა მრავალდონიანი ინსტიტუციური სისტემა, რომელიც მოიცავს თანაბარი შესაძლებლობების ოფიცრებს, მრავალფეროვნების მართვის სტრუქტურებს, გენდერული საკითხების ინტეგრირებას რეკრუტირების, შერჩევისა და გადაწყვეტილების მიღების პროცესებში, ასევე სპეციალურ მექანიზმებს ქალი მეცნიერების აქტიური მოზიდვისა და მხარდაჭერისთვის.

დისკუსიის მნიშვნელოვანი ნაწილი დაეთმო ცნობიერების ამაღლების, ტრენინგების, სექსუალური შევიწროებისა და გენდერული ნიშნით ძალადობის პრევენციის საკითხებს. აღინიშნა, რომ ეფექტიანი ღონისძიებები უნდა იყოს მორგებული სხვადასხვა სამიზნე ჯგუფზე (სტუდენტებზე, აკადემიურ და ადმინისტრაციულ პერსონალზე) და მოიცავდეს როგორც პრევენციას, ისე მხარდაჭერისა და რეაგირების მექანიზმებს.

შეხვედრის ფარგლებში ასევე გამოითქვა ინიციატივა უნივერსიტეტში Gender Focal Point-ების სისტემის შექმნის შესახებ, რაც ხელს შეუწყობს ინფორმაციის გავრცელებას, მონაცემების შეგროვებას, თანამშრომლებისა და სტუდენტების ჩართულობას და გენდერული თანასწორობის პოლიტიკის უკეთ კოორდინაციას.

პროექტის მომდევნო ეტაპები მოიცავს თემატურ სამუშაო შეხვედრებს 2026–2027 წლებში, TSU-ის მონაცემების ანალიზს, SWOT-შეფასებას, კონკრეტული ღონისძიებების შემუშავებას და გენდერული თანასწორობის გეგმის საბოლოო ვერსიის მომზადებას. პარალელურად შეიქმნება მონიტორინგისა და შეფასების ჩარჩოც, რათა შესაძლებელი გახდეს განხორციელებული ცვლილებების შედეგების შეფასება და მდგრადი განვითარების უზრუნველყოფა.

შეხვედრის მთავარი გზავნილი იყო, რომ გენდერული თანასწორობა მხოლოდ დოკუმენტის არსებობას არ ნიშნავს - ის მოითხოვს ინსტიტუციურ ნებას, რესურსებს, მონაცემებზე დაფუძნებულ გადაწყვეტილებებს, ფართო ჩართულობასა და უნივერსიტეტის კულტურის თანმიმდევრულ ცვლილებას.