უმაღლესი სამედიცინო განათლების ისტორია დასაბამს 1918 წელს თბილისის სახელწიფო უნივერსიტეტის და მასში სამედიცინო ფაკულტეტის დაარსებიდან იღებს. 1919 წელს სამკურნალო ფაკულტეტი დაარსდა დამოუკიდებელი ფაკულტეტის სახით, ხოლო 1929-1930 სასწავლო წლის ბოლოს მან უნივერსიტეტში არსებობა შეწყვიტა. 1995 წელს თსუ-ში უმაღლესი სამედიცინო განათლება აღდგა თავდაპირველად მედიცინის სპეციალობის სახით ბიოლოგიისა და მედიცინის ფაკულტეტზე, ხოლო 2000 წელს მედიცინის ფაკულტეტი ჩამოყალიბდა როგორც დამოუკიდებელი ფაკულტეტი.

თსუ მედიცინის ფაკულტეტის მისიას წარმოადგენს საერთაშორისო სტანდარტების შესაბამისად განვითარებული სამედიცინო განათლებისა და მეცნიერების ინსტიტუციად ჩამოყალიბება, რომელიც აღზრდის სამედიცინო დარგის სპეციალისტებსა და მკვლევარებს, რომელთა მოღვაწეობაც მიმართულია, ერთი მხრივ, ეროვნული ჯანდაცვის სისტემის სრულყოფისა და ჯანმრთელი სამოქალაქო საზოგადოების ჩამოყალიბებებისაკენ, ხოლო მეორე მხრივ, საერთაშორისო სამედიცინო სამეცნიერო აზრის განვითარებისაკენ.