კლასიკური ფილოლოგიის, ბიზანტინისტიკისა და ნეოგრეცისტიკის სასწავლო–სამეცნიერო ინსტიტუტი

• ინსტიტუტის დაარსების ისტორია

ინსტიტუტი შეიქმნა 1997 წელს ბერძნული და რომაული ფილო­ლოგიის სფეროში უნივერსიტეტში უკვე არსებული სასწა­ვლო და სამეცნიერო სტრუქტურული ერთეულების გაერთია­ნების სა­ფუძველზე. ინსტიტუტი განთავსებულია თსუ VIII  კორპუსში.  

დაარსებისა  და  საქმიანობის პროცესში ინსტიტუტს დიდი დახ­მარება გაუწია საბერძნეთის საელჩომ საქართველოში, საბერძ­ნეთის კულტურისა და განათლების სამინისტროებმა, ბერძნული კულტურის, ალექსანდროს ონასისის, ი.ფ. კოსტოპულოსის ფონ­დებმა. ინსტიტუტს სასწავლო  და  სამეცნიერო  პროგრამების  რეა­ლიზაციაში  აქტიურ დახმარებას  უწევდა  და  უწევს  საბერ­ძნეთის  საგარეო  საქმეთა სამინისტრო, უცხოეთში მცხოვ­რებ ბერძენ თანამემამულეთა გენერალური სამდივნო, რეპატრი­რე­ბულ ბერძენთა მიღებისა და განთავსების ნაციონალური, კოსტის და ელენი ურანისების სახელობის, დიონისიოს ვარელასის ფონდები, კვიპროსის სამინისტროები და ფონდები, ივანე ჯა­ვა­ხიშვილის სახელობის თბილისის სახელ­მწიფო უნი­ვერ­სი­ტეტის და ჰუმანიტარულ მეცნიერებათა ფაკულ­ტეტის ად­მინისტრაცია, სა­ქართველოს განათლებისა და მეცნიერების სამინისტრო, საქარ­თ­ველოს პრეზიდენტის სა­რეზერვო ფონდი, სსიპ შოთა რუს­თა­ველის ეროვნული სამეცნიე­რო ფონდი, სსიპ  ქართული წიგნის ეროვნული ცენტრი და სხვ.

ინსტიტუტი თსუ ჰუმანიტარულ მეცნიერებათა ფაკულტეტის  სტრუქტურული ერთეულია და საქართველოსა და საბერძნეთის ხელისუფლებისა და სასწავლო-სამეცნიერო ცენტრების ფართო მხარდაჭერით სარგებლობს. 1997-2018 წლებში ინსტიტუტს სტუმ­რობდნენ საბერძნეთისა და საქართველოს პრეზიდენტები – კონსტანტინოს სტეფანოპულოსი, ედუარდ შევარდნაძე, გიორგი მარგველაშვილი, საბერძნეთის პრემიერ-მინისტრი კონსტან­ტი­ნოს კარამანლისი, ათენისა და სრულიად საბერძნეთის არქიე­პის­კოპოსი ქრისტოდულოსი, სრულიად საქართვე­ლოს კათო­ლი­კოს-პატრიარქი ილია II და სხვ.

ინსტიტუტი დააარსა ცნობილმა ქართველმა მეცნიერმა და სა­ზო­გა­დო მოღვაწემ, საქსონიის მეცნიერებათა აკადემიის წევრ-კო­რეს­პონდენტმა, საქართველოს მეცნიერებათა აკადემიის აკა­დე­მი­კოსმა, პროფესორმა რისმაგ გორდეზიანმა.

ინსტიტუტში 1997 წელს გაერთიანდა: 1. კლასიკური ფილო­ლო­გიის კათედრა, რომელიც დაარსდა 1918 წელს და რომელსაც წლების განმავლობაში ხელმძღვანელობდნენ ცნობილი მეცნიე­რები გრიგოლ წერეთელი, სიმონ ყაუხჩიშვილი, რისმაგ გორ­დე­ზია­ნი. 2. ხმელთაშუა ზღვის კულტურების კვლევის ლაბო­რატო­რია, რომელიც დაარ­სდა 1982 წელს და რომელიც აწარმოებდა ხმელთაშუა ზღვის კულტურებისა და ენების კვლევას – ძველი აღმოსავლეთი, ანტიკური სამყარო, ბიზანტია, ბერძნულ-ქარ­თული ურთიერ­თობები. 3. ახალი ბერძნული ფილოლოგიის გან­ყოფილება, რომელიც დაარსდა 1987 წელს. 4. სიმონ ყაუხ­ჩიშვი­ლის სახელობის კაბინეტი – სპეციალიზებული ბიბ­ლი­ოთეკა, რომელიც დაარსდა 1995 წელს და შეიცავდა 30 000-მდე წიგნს ინსტი­ტუტის პროფილით. 5. საინფორმაციო-საგა­მომ­ცემ­ლო ცენტრი, პროგრამა “ლოგოსი”, რომელიც დაარს­და 1996 წელს და რომლის ამო­ცანაც იყო პუბლიკაციებისა და  ღონისძიებების  განხორ­­ციელება  ინსტიტუტის სპეციალობათა სფეროში. 6. “ბერ­ძ­ნულ-ლათინური ბიბლიო­თეკა”, რომლის მიზანი იყო ბერძნულ და ლათინურენოვან ავტორთა ქართულად თარგმნა და გამო­საცემად მომზადება.

• ინსტიტუტის სტრუქტურა

ინსტიტუტი დღეს აერთიანებს შემდეგ სტრუქტურულ ერთეუ­ლებს: კლასიკური ფილოლოგიის,  ბიზანტინისტიკისა  და  ნეო­გრეცისტიკის კათედრები, ხმელთაშუა ზღვის კულტურების შემსწავლელი სამეცნიერო-კვლევითი ლაბორატორია, სიმონ ყაუხჩიშვილის სახელობის ბიბლიოთეკა.

• საგანმანათლებლო პროგრამები და სტიპენდიები

ინსტიტუტი  ახორციელებს  სამივე  საფეხურის  საგანმანათლებ­ლო პროგრამებს. კერძოდ:

ბაკალავრიატი: კლასიკური, ბიზანტიური და ახალბერძნული ფი­ლო­ლოგია (ძირითადი და დამატებითი სპეციალობები) (240 ECTS);

მაგისტრატურა:  ბერძნულ-რომაული ფილოლოგია  სამი მო­დუ­ლით: კლასიკური, ბიზანტიური და ახალბერძნული ფილო­ლო­გია (120 ECTS);

დოქტორანტურა: კლასიკური, ბიზანტიური და ახალბერძნული ფილოლოგია, რომელიც ხორციელდება ჰუმანიტარულ მეც­ნიე­რე­ბათა ფაკულტეტის ფილოლოგიის სადოქტორო პროგრამის ფარ­გ­ლებში.

გარდა ამისა, ინსტიტუტის სასწავლო კურსები დიდი პოპუ­ლა­რობით სარგებლობს როგორც არჩევითი საგნები თსუ-ს ყველა ფაკულტეტზე. თსუ უცხოური ენების ცენტრი ასევე მთელ უნივერსიტეტს სთავაზობს კლასიკური – ძველი ბერძნული და ლა­თინური ენების და ახალი ბერძნული ენის სწავლებას.

ბიზანტიური ფილოლოგიის სტუდენტებს საშუალება აქვთ, უფასოდ ისწავლონ დიონისიოს ვარელასის ფონდის დაფი­ნანსებით, ხოლო ახალი ბერძნული ფილოლოგიის სტუდენტებს აქვთ შესაძლებლობა, სწავლის დასაფინანსებლად მიიღონ დავით ბეჟუაშვილის განათლების ფონდის, საბერძნეთის სხვადასხვა სამინისტროსა და ფონდის სტიპენდიები. სამივე მიმართულების ბაკალავრიატისა და მაგისტრატურის სტუდენტებს შეუძლიათ მოიპოვონ ალექსანდრე ალექსიძის სახელობის სტიპენდია, რო­მელიც ალექსანდრე ალექსიძის სახელობის ქართულ-ბერძნული ურთიერთობების განვითარე­ბის ფონდმა დააწესა.
 

• საგანმანათლებლო და სამეცნიერო-კვლევითი აქტი­ვო­ბები სტუდენტებისთვის

ინსტიტუტი ორგანიზებას უწევს ძველი ბერძნული და ლათი­ნური ენების კონკურსს VICTORIA, რომელშიც მონაწილეობის მიღება შეუძლიათ არა მხოლოდ თსუ-ს, არამედ საქართველოს ნებისმიერი უმაღლესი საგანმანათლებლო დაწესებულების სტუ­დენტებს და ზოგადსაგანმანათლებლო სკოლების მოსწავლეებს. გამარ­ჯვებულები ჯილდოვდებიან მოგზაურობით და საგამომ­ცემლო პროგრამა “ლოგოსის” ვაუჩერებით.

არისტოტელეს სახელობის თესალონიკის უნივერსიტეტის ბერ­ძნული ენის ცენტრთან თანამშრომლობით ინსტიტუტში ორ წელიწადში ერთხელ ტარდება ახალი ბერძნული ენის საერთა­შორისო აღიარების მქონე სასერტიფიკაციო გამოცდები.

ინსტიტუტში ასევე ფუნქციონირებს სტუდენტთა სამეცნიერო წრე, სტუდენტური კლუბი და ანტიკური დრამის სტუდია “ოდეონი”. სტუდენტები სის­ტემატურად აწყობენ სტუდენტურ კონფერენციებს, სემინარებს, პოეზიის საღამოებს, ფილმებისა და სპექტაკლების ჩვენებას, ფესტივალებს, ექსკურსიებს, დგამენ სპექტაკლებს და სხვ. 2005 წლიდან ინსტიტუტში სტუდენტების მონაწილეობით დაიდგა შემდეგი სპექტაკლები, პერფორმანსები არტისტული სამსჯავ­როები: ევრიპიდეს “ტროელი ქალები”, “იფი­გენია ავლისში” და “ორესტესი”, არისტოფანეს “ქალები სა­ხალ­ხო კრებაზე”, პლავ­ტუსის “ფსევდოლუსი”, იაკოვოს კაბანელისის “სერობა”,  “კლი­ტემ­ნესტრას, ელექტრას, ოდისევსის კომპ­ლექსი“, “მედეას სამსჯავრო“, “ვარიაციები ანტიკური სამოსელის თემაზე“ და სხვ.

2015 წლიდან ინსტიტუტი სისტემატურად ატარებს სტუდენტურ კონფერენციას „ანტიკურობის თანამედროვეობა“, რომლის ფარგ­ლებში წაკითხული რჩეული მოხსენებები იბეჭდება ინსტი­ტუ­ტის სტუდენტურ სამეცნიერო ჟურნალში „მნემოსინე“. 2022 წლი­დან კონფერენციამ „ანტიკურობის თანამედროვეობა“ შეი­ძინა საერთაშორისო ფორმატი.

2017 წელს ინსტიტუტი შეუერთდა ლათინურისა და ბერძნული ენის ევროპულ ფესტივალს, რომლის ფარგლებშიც ჰომეროსის “ოდისეა” ერთდროულად და საჯაროდ წაიკითხეს 20-ზე მეტ ქვეყანაში, 40-ზე მეტ ენაზე და მათ შორის ქართულად.

• აქტივობები სკოლის მოსწავლეებისთვის

1996 წლიდან ინსტიტუტი საბერძნეთის საგარეო საქმეთა სამი­ნისტროს მხარდაჭერით კოორდინაციას უწევს პროგრამას “ბერძნული ენა საქართველოს სკოლებში”. ამჟამად ინსტიტუტის კურსდამთავრებულები ინსტიტუტის პროფესურის მიერ მომ­ზადებული სახელმძღვანელოებით ასწავ­ლი­ან ახალბერძნულ ენას საქართველოს ზოგადსაგანმანათლებლო სკოლებში.

ინსტიტუტის მხარდაჭერით 2013 წლიდან  ხორციელდება კულ­ტუ­რულ-საგანმანათლებლო ფესტივალი “ოქროს საწმისი”, რომ­ლის ერთ-ერთი მიზანია ბერძნული კულტურის პოპულარიზაცია და რომელშიც მონაწილეობენ  საქართველოს  ზოგადსა­განმანათ­ლებ­ლო სკოლების მოსწავლეები.  ფესტივალის  ფარგ­ლებ­ში ტარ­დე­ბა  კონფერენციები, საჯარო ლექციები, ვიქტო­რინები, კონ­კურსები, ფილმების ჩვენება, თეატრალური წარმოდ­გენები და სხვ.

ინსტიტუტი ასევე აქტიურად არის ჩართული თსუ საბავშვო უნივერსიტეტის საქმიანობაში. ინსტიტუტის თანამშრომლები პერიოდულად ატარებენ სამუშაო შეხვედრებსა და ტრენინგებს საქართველოს ზოგადსაგანმანათ­ლებლო სკოლის მასწავლებ­ლების­თვის.

• საერთაშორისო თანამშრომლობა

ინსტიტუტს  მჭიდრო  კონტაქტები  აქვს  საბერძნეთის,  კვიპ­რო­სის, გერმანიის, იტალიის, საფრანგეთის, ინგლისის, ამერიკის შეერთე­ბული შტატების, ბულგარეთის წამყვან უნივერსიტეტებ­თან და სამეცნიერო-კვლევით ცენტრებთან. ყოველწლიურად ინსტიტუტის არაერთი თანამშრომელი და სტუდენტი მიემგზავ­რება სხვადასხვა ვადით საზღვარგარეთ სამეცნიერო კონფერენ­ციებში მონაწილეობის მისაღებად, ლექციებისა და მოხსენებების წასაკითხად, სამეცნიერო-კვლევითი  საქმიანობისთვის,  კვალი­ფიკაციის  ასამაღლებლად, სასწავლო პრაქტიკის გასავლელად და სხვ. ინსტიტუტის თანამშრომლები და სტუდენტები ასევე ხში­რად სარგებლობენ ევროკავშირის Erasmus Mundus/Erasmus+ სტიპენდიებით.

2023 წელს ინსტიტუტმა თანამშრომლობა დაიწყო კლასიკური ენებისა და კულტურის შემსწავლელ ცნობილ ცენტრთან, Academia Vivarium Novum-თან (იტალია) და გახდა ევროპული გაერთიანება EUROCLASSICA-ს წევრი.  

კლასიკური  ფილოლოგიის  კათედრა  ძველი  მსოფლიოს  ისტო­რიის კათედრასთან თანამშრომლობით 2015-2018 წლებში ჩარ­თუ­ლი იყო ციფრული სიძველეთმცოდნეობის დიდ საერ­თაშო­რისო პროექტში SunoikisisDC, რომელშიც მისი პარტნიორები იყვ­ნენ ჰარვარდის უნივერსიტეტის ელინისტიკის ცენტრი, ლაიპ­ციგის უნივერსიტეტის ციფრული ჰუმანიტარიის კათედრა,  ლონ­დო­ნის  სიძველეთმცოდნეობის  ინსტიტუტი,  ტაფტსის, ფლო­­რი­დის, სან პაოლოს, ლიონ 2-ის, ოსლოს, სოფიის, ზაგრების უნი­ვერსიტეტები და სხვ.

2010-2023 წლებში, ინსტიტუტის ბაზაზე, ბოლონიის უნივერ­სიტეტ­თან თანამშრომლობით ხორციელდებოდა ქართულ-ფრანგუ­ლენოვანი სადოქტორო პროგრამა ევროპულ ლიტერა­ტუ­რაში (DESE – Doctorat d'Études Supérieures Européennes Les Littératures de l’Europe Unie), რომლის წარმატებულ კურსდამთავრებულებს მიენიჭათ როგორც თსუ-ს, ისე ბოლონიის უნივერსიტეტის ორმაგი აკა­დემიური ხარისხი.

2023 წელს ინსტიტუტი შეუერთდა საერთაშორისო კონსორ­ციუმს, რომლის კოორდინატორია ბოლონიის უნივერსიტეტი (იტალია) და რომელიც განახორციელებს ერაზმუს მუნდუსის ერ­თობლივ სამაგისტრო პროგრამას „ევროპული ლიტერა­ტუ­რული კულტურები“ (Master CLE). კონსორციუმის პარტ­ნიო­რე­ბია: ბოლონიის უნივერსიტეტი (იტალია), ოტ-ალზასის უნი­ვერ­სიტეტი, სტრასბურგის უნივერსიტეტი (საფრანგეთი), თესა­ლონიკის უნივერსიტეტი (საბერძნეთი), ლისაბონის უნი­ვერ­­სი­ტე­ტი (პორტუგალია), დაკარის უნივერსიტეტი (სენეგალი), მუმბაის უნივერ­სიტეტი (ინდოეთი).

ინსტიტუტი სისტემატურად აწყობს საერთაშორისო კონფერენ­ციებს, რომლებშიც მონაწილეობს ასობით მეცნიერი მსოფლიოს სხვადასხვა ქვეყნიდან. 2014 წელს ინსტიტუტმა აღადგინა იენის ფრიდრიჰ შილერის უნივერსიტეტთან თანამშრომლობით ერ­თობ­ლივი  საერთაშორისო კონფერენცი­ების ჩატარების ტრა­დი­ცია. ასევე 2014 წლიდან ინსტიტუტი ძველი მსოფლიო ისტორიის  კათედრასთან  თანამშრომლობით აწყობს საერთაშო­რისო სე­ზონურ სკოლებს. ინსტიტუტი 2015-2017 წლებში მონა­წილეობდა მეცნიერებისა და ინოვაციების საერთაშორისო ფესტივალში, რომლის ორგანიზატორიც იყო საქართველოს განათლებისა და მეცნიერების სამინისტრო.

ინსტიტუტის ბაზაზე ფუნქციონირებს საქართველოს ნეოგრეცის­ტთა ასოციაცია და ნიკოს კაზანძაკისის საზოგადოება. 2022 წლიდან ინსტიტუტმა თანამშრომლობა დაიწყო საბერძნეთის კულტურის ფონდთან.

ინსტიტუტისთვის მხარდაჭერის მიზნით 1999 წელს დაფუძნდა თსუ კლასიკური ფილოლოგიის, ბიზანტინისტიკისა და ნეოგ­რე­ცისტიკის ინსტიტუტის განვითარების ფონდი, რომლის მიზანია ინსტიტუტის საქმიანობის მატერიალური სტიმულირების სა­შუა­ლებათა მოძიება.

• სამეცნიერო-კვლევითი საქმიანობა

ინსტიტუტი სამეცნიერო კვლევებს ახორციელებს კლასიკური, ბიზანტიური და ახალბერძნული ფილოლოგიის სფეროში შემდეგი მიმართულებებით: ძველი და ახალი ბერძნული, ლა­თი­ნუ­რი ენების ფონეტიკური, მორფოლოგიურ-სინტაქსური ას­პექ­ტები; ბერძნული და ლათინური ენების ისტორია; კლასიკური, ბიზანტიური და ახალბერძნული ლიტერატურისა და კულ­ტურის აქტუალური მსოფლმხედველობრივი და მხატვ­რული ასპექტები; ანტიკურობის რეცეფცია გვიან ანტიკურ ხანაში, ბიზანტიასა და თანამედროვე სამყაროში; ქართულ-ბერძნული და ქართულ-ბიზანტიური ლიტერატურული და კულტურული ურთიერთობები და სხვ.

ინსტიტუტის ბაზაზე სისტემატურად ტარდება შეხვედრები „აგორაზე“, რომელიც აერთიანებს კვლევით სემინარებს, საჯარო ლექ­ციებს, მოხსენებებსა და პრეზენტაციებს. „აგორას“ ღონის­ძიე­ბებში მონაწილეობენ როგორც ინსტიტუტის თანამშრომლები, ისე ქარ­თველი და უცხოელი კოლეგები საქართველოსა და უცხო­ეთის წამყვანი საგანმანათლებლო და სამეცნიერო-კვლევითი ცენტრებიდან.

• მნიშვნელოვანი სამეცნიერო-კვლევითი პროექტები

1. ენციკლოპედია “ანტიკური კავკასია”
2. ანტიკურობის რეცეფცია ქართულ ლიტერატურაში
3. ბერძნულ-ქართული ლექსიკონი
4. ქართულ-ბერძნული ლექსიკონი
5. საქართველოს ბერძნული წარწერების ონლაინ კატალოგი

• საგამომცემლო საქმიანობა

ინსტიტუტის ბაზაზე ფუნქციონირებს საგამომცემლო პროგრამა “ლოგოსი”, რომელმაც არსებობის მანძილზე გამოსცა 230-ზე მეტი წიგნი, მათ შორის მონოგრაფიები, სახელმძღვანელოები, ლექ­სიკონები, ენციკლოპედიები,  თარგმანები, სამეცნიერო  კრე­ბუ­ლები, სამეცნიერო პერიოდიკა და სხვ. საგამომცემლო პროგ­რამა „ლოგოსი“ უზრუნველყოფს ინსტიტუტის საგანმანათ­ლებ­ლო პროგრამებს ქართულენოვანი სახელმძღვანელოებით.

• სამეცნიერო ჟურნალები

ინსტიტუტი გამოსცემს თავისი სამეცნიერო პროფილის შესა­ბამის შემდეგ სამეცნიერო-კვლევით პერიოდულ გამოცემებს:

1. საერთაშორისო, რეფერირებადი, უცხოენოვანი, ბეჭდური და ელექტრონული სამეცნიერო ჟურნალი Phasis – “ფაზისი” (გა­მო­დის 1999 წლიდან), ინდექსირებულია საერთაშორისო სამეც­ნიერო ბაზაში ERIH-PLUS და SCOPUS;
2. რეცენზირებადი ბეჭდური და ელექტრონული სამეცნიერო ჟურ­ნალი „ლოგოსი. წელიწდეული ელინოლოგიასა და ლა­თი­­ნისტიკაში“;
3. სტუდენტური ჟურნალი “მნემოსინე”.

• ინსტიტუტის მიერ ორგანიზებული საერთაშორისო ღონისძიებები

კონფერენციები და სიმპოზიუმები:

1. “ელინისტიკა საუკუნეთა მიჯნაზე”, 21-26 IX, 2000
2. “ელინოფილური დღეები”, 3-10 V, 2004
3. “არგონავტიკა და მსოფლიო კულტურა”, 1-5 V, 2007
4. “ბერძნული ცივილიზაცია და კულტურათა დიალოგი”, დე­მოკ­­რიტეს სახელობის თრაკიის უნივერსიტეტთან თანა­მშ­რომ­ლობით, 5-7 V, 2011
5. “საბერძნეთი – ევროპული იდენტობა – საქართველო”, 27-29 VI, 2012
6. “ანტიკური კულტურისა და მისი მემკვიდრეობის აქტუა­ლუ­რი პრობლემები”, იენის ფრიდრიჰ  შილერის  უნი­ვერ­სი­ტეტ­თან თანამშ­რომ­ლობით, 23-27 IX, 2014
7. “ინოვაციის იდეა და ფორმები ბერძნულ კულტურაში (ანტი­კურობა, შუა საუკუნეები, თანამედროვეობა)”, მეცნიერებისა და ინოვაციების ფესტივალი – თბილისი 2016, 19-20 IX, 2016
8. “მედეას თემა მსოფლიოს მხატვრულ კულტურაში”, 17-20 IX, 2017
9. “პლატონის ფილოსოფია ინტერდისციპლინურ კონტექსტში”, 28-30 V, 2018
10. “კლასიკური ენების სწავლება XXI საუკუნეში – Vitae Disci­mus”, 24-27 II, 2021 (ონლაინ ფორმატში)
11. “ანტიკური და ბიზანტიური სამყარო ინტერდისციპლინური კვლე­ვების შუქზე”, 22-24 IX, 2021 (ონლაინ ფორმატში)
12. “ნეოგრეცისტიკა საქართველოში – 4”, 19-20 XI, 2021 (ონლაინ ფორმატში)
13. “კავკასიის აღქმა მითოლოგიასა და ლიტერატურაში ან­ტი­კუ­რობიდან დღემდე”, იენის ფრიდრიჰ შილერის უნივერ­სი­ტეტ­თან თანამშ­რომ­ლო­ბით, 20-22 IX, 2023
14. “ორი იბერია - ევროპის ორი კარიბჭე“, მადრიდის კომპულტენსეს უნივერსიტეტთან და კავკასიის უნივერსიტეტთან თანამშრომლობით, 12-14 VI, 2024

საერთაშორისო სეზონური სკოლები

1. ზამთრის სკოლა “შესავალი ციფრულ ფილოლოგიაში”, 14-18 I, 2014
2. ზამთრის სკოლა “ხელისუფლება და იდეოლოგია ძველ სამ­ყაროში”, 11-14 II, 2014
3. საზაფხულო სკოლა “ციფრული კვლევის მეთოდები ფილო­ლოგიურ მეცნიერებებში”, 25-29 VIII, 2014
4. ზამთრის სკოლა “ანტიკური სამყარო და კავკასია”, 6-11 III, 2017

საკონტაქტო ინფორმაცია:

ილია ჭავჭავაძის გამზ. N 13, 0179, თბილისი

თსუ VIII კორპუსი

ელფოსტა: greekstudies@tsu.ge