ჩემი საშობაო ზღაპარი (შედეგები)

Home Continuous Courses News ჩემი საშობაო ზღაპარი (შედეგები)

ჩემი საშობაო ზღაპარი (შედეგები)

კონკურსი „ჩემი საშობაო ზღაპარი“ დასრულდა

საშობაო ზღაპარი კეთილი, ჯადოსნური, ლამაზი ამბებია, სადაც სიკეთე იმარჯვებს. თქვენი დავალება იყო, შეგექმნათ საშობაო ზღაპრები. კონკურსში მონაწილეობა შეეძლო ნებისმიერი კლასის მოსწავლეს. განსაზღვრული იყო კონკურსის პირობები და ნაშრომის მოცულობა კლასების მიხედვით.

პირველ რიგში უნდა აღინიშნოს, რომ თსუ საბავშვო უნივესიტეტში ბევრი განაცხადი შემოვიდა, რამაც ძალიან გაგვახარა. აქაც ვაქვეყნებთ თქვენ მიერ გამოგზავნილ საშობაო ზღაპრებს, რადგან, ვფიქრობთ, მიუხედავად კონკურსის პირობების განსხვავებულად შესრულებისა, ყოველი გამოხმაურება და თქვენ მიერ გამოგზავნილი ყოველი საშობაო ისტორია იმსახურებს ყურადღებას.

საზოგადოდ უნდა ითქვას, რომ ამ ისტორიებში გადმოცემულია ბავშვების, მოსწავლეების სურვილები, იმედები, ამბები, რომლებიც გარკვეულწილად უკავშირდება სიხარულს, საახალწლო თავგადასავლებს, ასევე, სევდასა და ტკივილს, ემიგრაციას, ომის მოუშუშებელ ტკივილებს და სხვა. ჩანს, რომ მოსწავლეთა უმრავლესობის ფანტაზია, ოცნებები და ასევე, საშობაო ზღაპრის შექმნის მცდელობები მეტად ტრაფარეტულ, შაბლონურ საკითხებზეა კონცენტრირებული, იმეორებს უკვე მრავალგზის ცნობილ ისტორიებს და ისტორიის შექმნაში ან მის გადმოცემაში სიახლეს, ორიგინალური ასახვის კუთხეს, ნაკლებად წარმოადგენს.

აქვე უნდა აღვნიშნოთ ქართული ენისა და ლიტერატურის მასწავლებლების წვლილის შესახებ. კონკურსის ერთ-ერთი მიზანი იყო პედაგოგებისა და მოსწავლეების თანამშრომლობა, იმ ლექსიკური, სტილისტური თუ სხვა ხარვეზების გასასწორებლად, რომლებიც მოსწავლეთა ნაშრომებში ხშირად გვხვდება. თუმცა მასწავლებელთა ჩართულობა ამ ნაშრომებში ნაკლებად შეინიშნება. იმედს ვიტოვებთ, მომავალში მასწავლებლები კიდევ უფრო აქტიურად ჩაერთვებიან მოსწავლეთა საკონკურსო ნაშრომების სრულყოფაში.

ძვირფასო მოსწავლეებო, სამომავლოდ ვისურვებდით, რომ დაუფიქრდეთ თითოეულ დეტალს, შეეცადოთ, უფრო საინტერესოდ, უფრო მრავალფეროვნად აღწეროთ და გადმოვცეთ როგორც მთლიანად ისტორია, ისე მისი ცალკეული დეტალები.

გისურვებთ წარმატებებს და გილოცავთ შობა-ახალ წელს!

თქვენი

თსუ საბავშვო უნივერსიტეტი

საშობაო ზღაპრები(სერტიფიკატის მისაღებად აუცილებელია გამომგზავნი ელ.ფოსტიდან მოგვწეროთ)